DASH, Berisha: Duhet ta lexoni drejt raportin
Kryeministri Sali Berisha gjeti rastin t‘i përgjigjet nga qyteti i Fierit raportit të Departamentit Amerikan të Shtetit për Shqipërinë. Pyetjes mbi qëndrimin e qeverisë shqiptare ndaj raportit lidhur me ndërhyrjet e qeverisë në prokurori dhe gjyqësor, Kryeministri iu përgjigj se nuk është raporti që thotë kështu, por janë mediat që shprehen se ka ndërhyrje. “Lexojeni raportin siç është. Media e kontrolluar nga Edi Rama thotë që është ndërhyrë. Ju e kuptoni vetë se çfarë terrori ushtron ai mbi mediat”, theksoi Berisha. Kreu i qeverisë veçoi për të cituar një nga pikat e raportit me të cilat ka preferuar të mburret, luftën ndaj korrupsionit dhe dënimin e zyrtarëve të lartë të administratës. “E vërteta është që kjo shënon periudhën e parë në historinë e këtij vendi që po penalizohen zyrtarë. Sigurisht po flihet mbi dosjet e sistemit të kleptokracisë dhe kjo është një gjë shumë e keqe, por po penalizohen zyrtarët e kësaj administrate dhe kjo është një gjë shumë e mirë”, tha Berisha, duke hedhur kështu “shigjeta” kritikash drejt organit të akuzës se nuk po heton ish-zyrtarët e qeverisjeve të majta. Shefi i qeverisë mohoi drejtpërdrejt faktin që Departamenti Amerikan i Shtetit të ketë cituar në raportin e tij më të fundit kritika për kabinetin e tij qeveritar. Kryeministri Berisha u tregua sakaq i kujdesshëm në deklaratat e tij, duke anashkaluar komentet për ligjin e lustracionit dhe tentativat e qeverisë për të ndërhyrë te prokurorët dhe gjyqtarët, duke transmetuar çdo faj mbi rivalin e tij politik, Edi Rama. Shefi i mazhorancës nuk dha asnjë përgjigje për atë çka cilësohet si beteja e qeverisë me organet e drejtësisë, gjykatat dhe prokurorinë. Ky reagim i Kryeministrit vjen një ditë pasi Partia Demokratike dhe Partia Socialiste e lexuan në mënyra të ndryshme raportin gjatë debateve në Parlament. Por i ndodhur në Fier për inaugurimin e një rruge, Kryeministri hoqi çdo përgjegjësi nga qeveria e tij, duke thënë se lufta ndaj korrupsionit ka marrë vlerësime në raportin më të fundit të Departamentit Amerikan të Shtetit. Një ditë më parë ishte kryetari i Partisë Socialiste, Edi Rama, ai që reagoi duke akuzuar Berishën si përgjegjës të kritikave që SHBA i adreson shtetit shqiptar në kuadër të të drejtave të njeriut. Raporti i DASH dy ditë më parë vlerësonte se qeveria ka ndërhyrë në çështjet e institucioneve të pavarura, duke veçuar ato të gjyqësorit, hetimet e prokurorisë për shpërthimin e depos së Gërdecit, si dhe presionin ndaj mediave.
Burimi: Gazeta Shqip
