Barcelona-Bayern, vjen akordi per Riberi
(2 vota)Barcelona ka gjetur marrëveshjen parimore me Bajernin e Mynihut për blerjen e Frank Riberisë gjatë merkatos së verës. Mediat spanjolle pretendojnë se oferta konkrete për yllin francez do të bëhet menjëherë sapo të mbyllet sezoni. “Blaugranat” shihen si skuadra më e fortë në garën për Riberi, ndërkohë që drejtuesit e klubit janë të bindur se 25-vjeçari mund të ambientohet lehtë me lojën e skuadrës dhe i përshtatet më së miri skemave të Pep Guardiolës. Në javët në vazhdim, dy klubet pritet të ulen sërish në tavolinën e bisedimeve. Vetëm pak kohë më parë, lojtari deklaroi se do të habitej nëse do të qëndronte në “Alianz Arena” deri në fund të kontratës, që skadon në vitin 2011. “Di që Barça më kërkon dhe kam biseduar shumë me menaxherin tim rreth mundësive për t‘u transferuar atje”, pohoi Riberi. Me këtë marrëveshje, katalanët mposhtën konkurrencën e Realit të Madridit, Çelsit, Mançester Sitit, Juventusit dhe Milanit. flitet se presidenti Laporta ka diskutuar rreth këtij transferimi me drejtuesin e bavarezëve, Franc Bekenbauer.
Burimi: Gazeta Shqip
