Perez, revolucion te Reali, shkrihet klani i holandezeve
Pas “masakrimit” nga Barcelona, mediat spanjolle janë të bindura se Reali do t‘i nënshtrohet ndryshimeve drastike në merkaton e verës. Emrat që qarkullojnë rreth emërimit të mundshëm të Florentino Perez në krye të klubit janë të shumtë, e sipas gazetës “Marca”, shumë lojtarë e trajnerë kanë shprehur dëshirën të bëhen pjesë e “merengues”. Lëvizja e parë e presidentit të ri do të jetë largimi i disa lojtarëve, në mënyrë që kontingjenti të mos jetë i mbingarkuar. Aktualisht madrilenët kanë 28 lojtarë, synohen të bëhen të paktën pesë blerje të reja, por për sezonin e ardhshëm, në ekip do të ketë vetëm 25 vende (edhe pse në La Liga skuadrat mund të mbajnë 30-40 futbollistë të regjistruar). Kanavaro dhe Dudek do t‘i japin fund aventurës, pasi u përfundojnë kontratat me klubin, Fobert rikthehet tek Uest Hemi, ndërsa më i prekuri nga “fshesa” është klani i holandezëve. Në “Santiago Bernabeu” synojnë të largojnë gjashtë “tulipanët” e mbërritur gjatë presidencës së Kalderonit: Roben, Van Nistelroi, Huntelar, Drente, Shnajder e Van der Vart. Perez shpreson që nga shitjet e tyre të përfitojë të paktën 100 milionë euro (gjatë dy viteve e gjysmë, për të afruar këta futbollistë janë shpenzuar 125 milionë euro). Me shifrën e përfituar nga shitjet dhe mbështetjen e madhe ekonomike që gëzon, pas asamblesë zgjedhore të 14 majit, Florentino mund të fillojë fushatën e blerjeve. Gazeta “Marca” bëri të ditur se menaxherët e David Vijës, Diego Forlan, Karlitos Tevez e Frenk Riberisë kanë kontaktuar me kreun e ardhshëm të Realit, për t‘i shprehur gatishmërinë që të fillojnë negociatat. Sipas së përditshmes, në këtë listë ndodhet edhe emri i Hoze Murinjos, pavarësisht se trajneri ka mohuar largimin nga Interi në fund të sezonit. Objektivi është blerja e të paktën katër yjeve të konfirmuar në arenën ndërkombëtare, ndërkohë që mes alternativave nuk mungojnë Kaka, Çesk Fabregas, Ksabi Alonso e David Silva.
Sipas “As”, braziliani i Milanit shihet si blerja e parë në “Bernabeu”. Pas përgënjeshtrimit nga babai-menaxher i mesfushorit, se “27-vjeçari do të luajë me Realin gjatë sezonit të ardhshëm”, titujt e përdorur ishin disi më të butë. Gazeta shkruante se Kaka ka zgjedhur Madridin, nëse do të vendosë të largohet nga Milani, duke mos i kushtuar vëmendje interesimit nga Çelsi, Mançester Junajtid dhe Mançester Siti. Nuk kishte si të mos përmendej miqësia ndërmjet Perez dhe Galianit, që mund të ndihmonte palët në gjetjen e akordit. Por, nëse ylli i përfaqësueses “seleçao” nuk do të largohet nga Seria A, merkato do të përqendrohet te Fabregas. Emri i mesfushorit të Arsenalit është lidhur në shumë raste edhe me një rikthim të mundshëm te Barcelona, megjithatë, ai ka deklaruar se do të vazhdojnë të luajë me skuadrën e Venger. 22-vjeçari u shpreh se “e ardhmja ime është tek Arsenali, dëshiroj të vazhdoj aventurën këtu. Nuk më duket e nevojshme të përgënjeshtroj zërat rreth së ardhmes time, pasi nuk kam ndërmend të largohem”.
Burimi: Gazeta Shqip
