Ndihmoi vrasesin e Vidohoves, gjendet i varur me litar ne shtepi
Masakra e fshatit Vidohovë të Devollit “shënon” një tjetër viktimë. Njeriu që ndihmoi autorin e vrasjes së trefishtë, Besim Karaj, teksa largohej nga vendi i ngjarjes, është gjetur i vetëvarur mëngjesin e djeshëm. I moshuari që i dha ushqim me vete dhe një palë çizme Besim Karajt, përpara se ai të largohej për t’i shpëtuar kapjes dhe prangosjes nga policia, është gjetur i varur në banesën e tij, që ndodhet në lagjen e sipërme të fshatit Vidohovë. Policia lokale është sinjalizuar në orët e para të mëngjesit për gjetjen e një personi të varur në haurin e bagëtive. Menjëherë uniformat blu dhe ekspertë të policisë kriminale janë nisur drejt vendit të ngjarjes dhe sapo kanë mbërritur atje kanë konstatuar se i vetëvaruri ishte 67-vjeçari Ismet Musabej. Ai ishte i martuar, por nuk kishte fëmijë. Kohët e fundit ai jetonte vetëm, pasi e shoqja ishte e sëmurë dhe prej disa javësh ishte shtuar në spital. Mësohet se i moshuari i ka dhënë fund jetës në banesën e tij në haurin e bagëtive me një litar dhe kanë qenë fqinjët e tij ata që kanë pikasur dhe më pas njoftuan policinë për ngjarjen.
Uniformat blu menjëherë kanë krijuar lidhje mes vetëvrasjes së 67-vjeçarit dhe vrasjes së trefishtë të ndodhur 10 ditë më parë në të njëjtin fshat. Burime nga policia bëjnë të ditur se Musabej është fqinj i Besim Karajt, 45-vjeçarit i cili ekzekutoi me armë zjarri vëllezërit: Taulant, Xhiljan dhe Edlevan Mulliri. Ngjarja tronditëse e vrasjes së tre vëllezërve Mulliri mesditën e 29 janarit është rikthyer në kujtesën e komunitetit të zonës. Në fshat thonë se 67-vjeçari mund të ketë vrarë veten nga frika, pasi kishte ndihmuar Besimin para largimit nga fshati. 67-vjeçari ishte marrë në pyetje nga policia, pasi në afërsi të shtëpisë së tij u gjetën disa gjurmë, që dyshohej se i përkisnin autorit të vrasjes së trefishtë. Ai kishte pranuar se e kishte ndihmuar 45-vjeçarin nga Thumana duke i dhënë bukë dhe një palë çizme. Marrja në pyetje në cilësinë e dëshmitarit dhe personit që ndihmoi autorin e vrasjes, mund të kenë ndikuar në gjendjen psikologjike të të moshuarit. Banorët e fshatit thonë se pas marrjes në pyetje nga policia, Ismeti dukej i frikësuar. Ndoshta frika për ndihmën e dhënë vrasësit të trefishtë apo vrasja e ndërgjegjes mund të kenë qenë arsyet e rëndimit të gjendjes së tij psikologjike. Por Besim Karaj, që ka dalë para trupit gjykues për dhënien e shpjegimeve dhe vlerësimin e masës së sigurisë nuk e ka përmendur asnjëherë personin që i ka dhënë ndihmë gjatë largimit nga fshati Vidohovë, por vetëm ka sqaruar rrugën që kishte ndjekur deri te shtëpia e vëllait në Thumanë ku dhe u vu në prangat e policisë.
Burimi: Gazeta Shqip
