Lorik Cana: Perballja me blute, nje kenaqesi
Një prej shqiptarëve që është lumturuar nga verdikti i shortit në Varshavë ka qenë pa dyshim Lorik Cana. Mesfushori kuqezi, e ka pritur me kënaqësi lajmin se përfaqësuesja e drejtuar nga Josip Kuzhe do të luajë në të njëjtin grup eliminator të Euro 2012 me Francën, nënkampione të botës në fuqi. “Më në fund do të ndeshem me përfaqësuesen e Francës në një aktivitet zyrtar”, deklaroi 26-vjeçari, i cili prej verës së kaluar luan në Premiershipin anglez me Sandërlendin. “Kam shumë kohë që e pres këtë përballje. Në karrierën time kam kaluar shumë vite në Ligën 1 franceze me PSG-në dhe Marsejën dhe gjithmonë kam dëshiruar që së bashku me Kombëtaren shqiptare të luaja kundër ‘gjelave’. Në periudhën kur Shqipëria nuk është e impenjuar në asnjë aktivitet, bëj tifo për Francën”.
Përballja me blutë është mjaft e veçantë, edhe për faktin se Cana do të ketë shansin të luajë përballë miqve dhe ish-kolegëve të tij. “Dueli” më i rëndësishëm është pa dyshim ai me ish-shokun e skuadrës tek Olimpik Marseja, Frenk Riberi. Kapiteni i Sandërlendit vazhdon të ketë kontakte me yllin e Bajernit të Mynihut, pavarësisht se tashmë ata luajnë në dy liga të ndryshme. “Jam shumë i lumtur që do të më jepet mundësia të luaj përballë Francës. Kam shumë shokë në këtë vend dhe disa prej lojtarëve që janë pjesë e kontingjentit aktual të përfaqësueses i kam miq. Në fund, Lorik Cana foli edhe për kundërshtarët e tjerë të Grupit D: “Përveç Francës, që e shoh si favoriten kryesore për t’u kualifikuar në Europianin 2012 mendoj se grupi është mjaft i balancuar dhe të gjitha skuadrat kanë shanset e tyre”.
Burimi: Gazeta Shqip
