Sejdiu: Jo ne Samitin e BE me logon UNMIK
Presidenti i Republikës, Fatmir Sejdiu, nuk do të pranojë që të shkojë në konferencën rajonale BE-Ballkani Perëndimor, që do të mbahet më 20 mars në Bërdo afër Kranjës, nëse Kosova ftohet të përfaqësohet nën logon UNMIK/Kosovo. Këshilltari i Presidentit Xhavit Beqiri tha se Sejdiu do të marrë pjesë vetëm si President i Republikës së Kosovës dhe në asnjë mënyrë tjetër. Reagimi i Presidencës vjen pas shkrimeve të mediave serbe se Kosova në atë konferencë do të përfaqësohet nga UNMIK-u. Madje e përditshmja serbe “Danas”, duke u thirrur në burimet e saj në Bruksel, shkruan se Presidenti i Kosovës, Fatmir Sejdiu, dhe Kryeministri Hashim Thaçi “tashmë janë pajtuar” të marrin pjesë në këtë konferencë dhe se në dokumentet e konferencës Kosova pritet të përfaqësohet me logon UNMIK/Kosovo, ndërkaq para të pranishmëve në tryezë do të qëndrojë vetëm emri i tyre dhe jo edhe shteti prej nga vijnë. “Presidenti i Republikës së Kosovës, dr. Fatmir Sejdiu, deri më sot nuk ka marrë ftesë zyrtare për konferencën BE-Ballkani Perëndimor, e cila do të mbahet në Bërdo të Sllovenisë më 20 mars 2010”, thuhet në një njoftim të zyrës së Presidencës. Disa media kanë shkruar se udhëheqësit e Kosovës, përkatësisht Presidenti Sejdiu dhe Kryeministri Thaçi, “tashmë kanë pranuar” që të marrin pjesë në këtë konferencë, ndonëse në dokumentet e konferencës Kosova pritet të përfaqësohet me siglën UNMIK/Kosovo. Prandaj, dëshirojmë të sqarojmë opinionin se Presidenti i Republikës së Kosovës, dr. Fatmir Sejdiu, në takime ndërkombëtare do ta përfaqësojë vendin tonë vetëm në kondita të barabarta me të gjithë presidentët e vendeve të tjera dhe assesi ndryshe, theksohet në këtë njoftim. Ndërkaq, sa i përket ftesës eventuale për UNMIK-un, Presidenti Sejdiu thekson se dërgimi ose jo i ftesës për UNMIK-un është çështje organizatorëve, porse në emër të Kosovës nuk mund të flasë askush tjetër përveç përfaqësuesve të saj legjitimë.
Burimi: Gazeta Shqip
